HOME • HEIM       SEARCH • LEIT       NEWS • FRÉTTIR       GUESTBOOK • GESTABÓK       CALENDAR • DAGATAL

Hugmyndir fisfélagið 2007

Hér er fínt að ræða um hverja kjósa skal í hin ýmsu embætti félagsins, hvað skal framkvæma og að hverju skal stefnt. Hvaða mál eru nauðsynleg fyrir félagsmenn að bæta og fl....

Hugmyndir fisfélagið 2007

Postby admin » Tue Feb 13, 2007 15:02

Hugmyndir fisfélagið 2007

Á félagsfundi 1. febrúar var fremur fámennt enda aðalfundur nýafstaðinn og fundarboðun fórst fyrir. Á fundinum var tekið létt hugarflug um hina ýmsu þætti í starfi félagsins og margskonar ábendingar og sjónarmið komu fram sem fylgja hér á eftir í símskeytastíl. Athugið að enginn dómur er lagður á það hvort þessar hugmyndir eru raunhæfar eða æskilegar, heldur er þeim ætlað að hvetja ykkur hin sem ekki voruð með til að bæta um betur og leggja hugmyndir í púkkið sem stjórn félagsins getur síðan moðað úr. Engin sérstök röð er á punktunum.
    Rétt væri að hafa svifdreka- og svifvængjamót aðskilin því ekki henta alltaf sömu aðstæður þessum ólíku vængjum.
    Samvera, t.d. í tjöldum á mótsstað, er mikilvægur hluti af félagsstarfi og mótshaldi.
    Hafa mætti paramótormót í fyrsta sinn.
    Gaman að keppa í sprengjukasti.
    Gott væri að hafa mót á landsbyggðinni, t.d. á norðurlandi eða vestfjörðum.
    Hafa þarf skýrari leikreglur í Hafragrautnum, t.d. mætti hafa grímubúningaskyldu.
    Það mætti endurvekja firmakeppni þar sem keppendur fá "sponsorship" frá fyrirtækjum enda verði gerð grein fyrir úrslitum í íþróttaþáttum fjölmiðlanna.
    Punktlendingakeppni hentar sérlega vel fyrir myndatökumenn fjölmiðla - að öðru leyti eru myndatökur erfiðar.
    Hafa mætti opinn kynningardag þar sem almenningi gefst kostur á að kynnast fisflugi.
    Bent var á að gott væri að fá veðurstöðina sem þegar hefur verið ákveðið að setja upp á Grund en sumir töldu að nóg væri af veðurupplýsingum frá öðrum aðilum. Paramótormenn á fundinum voru sérlega áhugasamir um veðurstöðina enda næmari fyrir veðri og vindum en önnur vélfis.
    Laga þyrfti vindstefnumæli á stöð veðurstofunnar á Skálafelli.
    Það þarf að sinna betur byrjendum og bjóða þeim að koma saman í glímu og flug þegar vel viðrar.
    Æskilegt væri að hafa fræðslufund um veðurfræði þar sem eldri og reyndari félagsmenn miðla til þeirra sem skemmra eru komnir, farið er yfir undirstöðuatriði í eðli og hegðun loftmassans og ekki síst skoðað hvar haldgóðar veðurupplýsingar er að finna.
    Fræðsla um notkun GPS tækja væri líka æskileg, gjarnan í tengslum við fræðslu um mótareglur.
    Gott væri að fá fræðslu um flug í termik og bylgjum. Þar gæti t.d. reyndur svifflugmaður miðlað af þekkingu sinni.
    Fróðleikur um talstöðvar væri líka vel þeginn.
    Nokkuð var rætt um árshátíðina og hugsanlega nýja staði. Menn nefndu, auk ýmissa staða á höfuðborgarsvæðinu, að fara mætti til Akureyrar, hafa árshátíðina um borð í flugvél eða á báti, í keilusal eða á gokartsvæði.
    Á ferðalögum vélfismanna veldur það nokkrum vandræðum að þriggja ása fisin fara töluvert hraðar en mótordrekarnir.
    Það mætti búa til gott útigrill fyrir félagið úr olíutunnu, þar sem fjórðungur hringsins er skorinn úr.
    Félagið þyrfti að berjast fyrir því að öryggisbúnaður verði frátalinn í þyngdartakmörkunum fisa.
    Það þyrfti að hafa tiltektardag á útisvæðinu.
    Æskilegt væri að paramótorar gætu fengið inni í flugskýlum enda taka þeir nánast ekkert pláss.
    Gamall svifdreki með ljósaröð á grindinni gæti verið skemmtilegt skraut, t.d. utan á flugskýli.
    Það er ástæða til að henda gömlum og ónýtum drekum sem núna eru í klúbbhúsinu á Grund.


Vona að þetta kveiki einhverjar fleiri gagnlegar eða skemmtilegar hugmyndir - látið þá í ykkur heyra!

Árni gjaldkeri
User avatar
admin
Site Admin
 
Posts: 258
Joined: Thu Dec 07, 2006 13:05
Location: Reykjavík • Reykjavik Iceland

Return to Stjórnir, nefndir og framkvæmdir

Who is online

Users browsing this forum: No registered users and 1 guest

cron